சினிமா உலகில் உச்சம் தொட்ட உலக நாயகன் கமல்ஹாசன், தற்போது ராஜ்ய சபா எம்பியாக புதிய அவதாரம் எடுத்துள்ளார். மக்கள் நீதி மய்யம் கட்சியின் தலைவர் என்ற அரசியல் அடையாளத்தோடு, இப்போது பாராளுமன்ற உறுப்பினராகவும் மாறியுள்ளார். இதனால், ஒரு எம்பியாக அவருக்கு கிடைக்கும் சம்பளம் மற்றும் சலுகைகள் குறித்த ஆர்வம் மக்களிடையே அதிகரித்துள்ளது. அதைப் பற்றிய முழு விவரங்களையும் இங்கே காணலாம்.
பாராளுமன்ற உறுப்பினராக (எம்.பி) தேர்ந்தெடுக்கப்படும் ஒருவருக்கு அடிப்படை சம்பளமாக மாதம் ரூ.1 லட்சம் வழங்கப்படுகிறது. உலக நாயகன் கமல்ஹாசனுக்கும் இதே சம்பளம் கிடைக்கும். இது தவிர, தனது தொகுதிப் பணிகளுக்காக மாதம் ரூ.70,000 தொகுதிப் படியாகவும், அலுவலகச் செலவுகளுக்காக (எழுதுபொருள் மற்றும் உதவியாளர் சம்பளம்) மாதம் ரூ.60,000 படியாகவும் வழங்கப்படும். ஆக, சம்பளம் மற்றும் படிகள் என மொத்தமாக மாதம் ரூ.2.30 லட்சம் கிடைக்கும்.
சம்பளம் மட்டுமல்லாமல், பாராளுமன்றக் கூட்டத்தொடரில் பங்கேற்கும் ஒவ்வொரு நாளுக்கும் ரூ.2,000 தினப்படியாக வழங்கப்படும். மேலும், பயணச் சலுகைகள் ஏராளம். ஆண்டுக்கு 34 முறை இலவச உள்நாட்டு விமானப் பயணங்கள் மேற்கொள்ளலாம். ரயிலில் முதல் வகுப்பில் இலவசமாகப் பயணிக்கலாம். இந்த சலுகைகள் அவரது குடும்பத்தினருக்கும் பொருந்தும் என்பது குறிப்பிடத்தக்கது.
டெல்லியில் தங்குவதற்கு வாடகையில்லாத பங்களா அல்லது வீடு ஒதுக்கப்படும். இல்லையெனில் அதற்கான வீட்டுப்படி வழங்கப்படும். இதுபோக, ஆண்டுக்கு 50,000 யூனிட் வரை இலவச மின்சாரம், 4,000 கிலோ லிட்டர் வரை இலவச தண்ணீர், மற்றும் இலவச தொலைபேசி வசதிகளும் கிடைக்கும். மத்திய அரசின் சுகாதாரத் திட்டத்தின் கீழ் இலவச மருத்துவ வசதிகளும் உண்டு. பதவிக்காலம் முடிந்த பிறகு வாழ்நாள் முழுவதும் ஓய்வூதியமும் உண்டு.
ஆக, ஒரு பாராளுமன்ற உறுப்பினர் பதவி என்பது வெறும் மக்கள் சேவை மட்டுமல்ல, அதனுடன் கணிசமான சம்பளம், எண்ணற்ற சலுகைகள் மற்றும் அதிகாரங்கள் இணைந்தே வருகின்றன. தனது புதிய ராஜ்ய சபா எம்பி பொறுப்பின் மூலம், நடிகர் கமல்ஹாசன் தமிழ்நாட்டிற்காகவும், மக்களுக்காகவும் என்னென்ன செய்யப் போகிறார் என்பதைப் பொறுத்திருந்துதான் பார்க்க வேண்டும்.
