தமிழகத்தின் நெற்களஞ்சியமான டெல்டா பகுதிகளை தலைநகர் சென்னையோடு இணைக்கும் முக்கிய உயிர்நாடி ரயில் தடம், தஞ்சாவூர் – விழுப்புரம் வழித்தடம். தினசரி ஆயிரக்கணக்கான பயணிகள் பயன்படுத்தும் இந்த பாதையில், ஒற்றை வழித்தடம் மட்டுமே இருப்பதால் ஏற்படும் கால தாமதங்கள் பயணிகளை பெரும் சிரமத்திற்கு உள்ளாக்கியுள்ளது. எனவே, இந்த வழித்தடத்தை இருவழிப் பாதையாக மாற்ற வேண்டும் என்ற கோரிக்கை பல ஆண்டுகளாக வலுத்து வருகிறது.
தற்போது இந்த வழித்தடத்தில் ஒரே ஒரு ரயில் பாதை மட்டுமே பயன்பாட்டில் உள்ளதால், ஒரு ரயில் செல்லும் நேரத்தில் எதிர் திசையில் இருந்து மற்றொரு ரயில் வந்தால், ஏதாவது ஒரு ரயில் நிலையத்தில் நிறுத்தி வைக்கப்பட்டு, மற்ற ரயில் சென்ற பின்னரே புறப்பட்டுச் செல்ல வேண்டிய நிலை உள்ளது. ‘கிராசிங்’ எனப்படும் இந்த நடைமுறையால், ரயில்கள் குறித்த நேரத்திற்கு செல்வது என்பது குதிரைக்கொம்பாக உள்ளது. இதனால், பயணிகள் மற்றும் சரக்கு ரயில்கள் மணிக்கணக்கில் தாமதமாக செல்வது வாடிக்கையாகிவிட்டது.
தஞ்சாவூர், கும்பகோணம், மயிலாடுதுறை, சிதம்பரம், கடலூர் போன்ற முக்கிய நகரங்களை இணைக்கும் இந்த வழித்தடம், வர்த்தகம், கல்வி, ஆன்மிகம் மற்றும் சுற்றுலாவுக்கு மிகவும் இன்றியமையாதது. ஆனால், ஒற்றை வழிப்பாதை காரணமாக இப்பகுதியில் புதிய ரயில்களை இயக்குவதிலும், ரயில்களின் வேகத்தை அதிகரிப்பதிலும் பெரும் சிக்கல் நிலவுகிறது. இது டெல்டா பிராந்தியத்தின் வளர்ச்சியை மறைமுகமாக பாதிக்கிறது.
இந்த பிரச்சனைகளுக்கு நிரந்தர தீர்வு காண, தஞ்சாவூர் முதல் விழுப்புரம் வரையிலான ரயில் பாதையை உடனடியாக இருவழிப் பாதையாக மாற்ற வேண்டும் என டெல்டா பகுதி மக்கள், வர்த்தகர்கள் மற்றும் ரயில் பயணிகள் சங்கத்தினர் தொடர்ந்து வலியுறுத்தி வருகின்றனர். ஒவ்வொரு ரயில்வே பட்ஜெட்டின் போதும் இதுகுறித்த அறிவிப்பு வெளியாகும் என எதிர்பார்க்கப்பட்டாலும், இதுவரை உறுதியான எந்த நடவடிக்கையும் எடுக்கப்படவில்லை என்பது இப்பகுதி மக்களின் ஆதங்கமாக உள்ளது.
டெல்டா மாவட்டங்களின் பொருளாதார வளர்ச்சிக்கும், லட்சக்கணக்கான பயணிகளின் நேரத்தை மிச்சப்படுத்தவும் தஞ்சை – விழுப்புரம் இருவழிப் பாதை திட்டம் மிகவும் அவசியமான ஒன்றாகும். இனியும் தாமதிக்காமல், மத்திய ரயில்வே அமைச்சகம் இந்த திட்டத்திற்கு உடனடியாக நிதி ஒதுக்கி, பணிகளைத் தொடங்க வேண்டும் என்பதே அனைத்து தரப்பு மக்களின் ஒட்டுமொத்த எதிர்பார்ப்பாக உள்ளது.
