ஒவ்வொரு மாதமும் வரும் மின்சாரக் கட்டணத்தைப் பார்த்து அதிர்ச்சி அடைகிறீர்களா? வழக்கத்தை விட அதிகமாக பில் வருவதற்கான காரணத்தை யோசித்துக் குழம்புகிறீர்களா? நாம் கவனிக்கத் தவறும் சில எளிய விஷயங்கள்தான் மின் கட்டணம் உயர முக்கியக் காரணம். அவை என்னென்ன என்பதைத் தெரிந்துகொண்டு, உங்கள் பணத்தை மிச்சப்படுத்த இந்த செய்தித் தொகுப்பு உதவும்.
பலர் செய்யும் பொதுவான தவறு, மின்னணு சாதனங்களை பயன்படுத்தாதபோது ஸ்விட்ச் ஆஃப் செய்யாமல் விடுவதுதான். டிவி, செட்-டாப் பாக்ஸ், மொபைல் சார்ஜர் போன்றவற்றை ரிமோட் மூலம் அணைத்தாலும், அவை ‘ஸ்டேண்ட்பை’ பயன்முறையில் தொடர்ந்து மின்சாரத்தை எடுத்துக்கொள்ளும். இது ‘வாம்பயர் பவர்’ என்று அழைக்கப்படுகிறது. இந்த சிறு துளி பெரு வெள்ளமாகி, மாத இறுதியில் உங்கள் பில் தொகையை அதிகரிக்கிறது. எனவே, பயன்பாட்டில் இல்லாதபோது மெயின் ஸ்விட்ச்சை அணைப்பதை வழக்கமாக்கிக் கொள்ளுங்கள்.
உங்கள் வீட்டில் பல வருடங்கள் பழைமையான குளிர்சாதனப் பெட்டி, ஏசி அல்லது கீசர் உள்ளதா? பழைய மாடல் சாதனங்கள் அதிக மின்சாரத்தை இழுக்கும் திறன் கொண்டவை. அதேபோல், வீட்டில் உள்ள வயரிங் பழுதடைந்திருந்தாலும் மின் கசிவு ஏற்பட்டு, மின்சாரப் பயன்பாடு அதிகமாகக் காட்டும். குறிப்பிட்ட கால இடைவெளியில் உங்கள் வீட்டு வயரிங் மற்றும் பழைய சாதனங்களின் நிலையை எலக்ட்ரீஷியன் மூலம் சரிபார்ப்பது மிகவும் அவசியம்.
புதிய மின் சாதனங்கள் வாங்கும்போது, அதன் விலையை மட்டும் பார்க்காமல் ‘ஸ்டார் ரேட்டிங்’களையும் கவனிப்பது புத்திசாலித்தனம். 5-ஸ்டார் குறியீடு கொண்ட பொருள்கள் மின்சாரத்தை மிகக் குறைவாகவே பயன்படுத்தும். ஆரம்பத்தில் இவற்றின் விலை சற்றுக் கூடுதலாக இருந்தாலும், நீண்ட கால நோக்கில் உங்கள் மின் கட்டணத்தைக் கணிசமாகக் குறைத்து, பணத்தை மிச்சப்படுத்த உதவும். இது ஒரு சிறந்த முதலீடாகும்.
மேற்கண்ட விஷயங்களில் கவனம் செலுத்தினாலே, உங்கள் மின்சாரக் கட்டணம் குறைவதை நீங்களே உணர முடியும். தேவையற்ற பயன்பாடுகளைத் தவிர்ப்பது, பழைய சாதனங்களைச் சரியான நேரத்தில் மாற்றுவது போன்ற எளிய பழக்கங்கள் பெரிய மாற்றத்தை ஏற்படுத்தும். இனி உங்கள் மின் கட்டணம் உங்கள் கட்டுப்பாட்டில் இருக்கட்டும். விழிப்புடன் செயல்பட்டு, பணத்தை சேமிப்போம்.
