ஆன்லைன் மோசடிகள் என்றாலே ஓடிபி அல்லது லிங்க் அனுப்புவதுதான் நம் நினைவுக்கு வரும். ஆனால், தொழில்நுட்ப வளர்ச்சிக்கு ஏற்ப மோசடியின் வடிவமும் மாறியுள்ளது. தற்போது எந்தவிதமான ஓடிபி அல்லது லிங்க்கும் இல்லாமல், நேரடியாக நம்மை மனரீதியாகவும், உளவியல் ரீதியாகவும் தாக்கிப் பணத்தைப் பறிக்கும் ஒரு புதிய வகை மோசடி வேகமாகப் பரவி வருகிறது. இது குறித்துத் தெரிந்துகொண்டு எச்சரிக்கையாக இருப்பது அவசியம்.
இந்த நவீன மோசடியில், குற்றவாளிகள் உங்களைத் தொலைபேசியில் அழைத்து, பிரபல கூரியர் நிறுவனம், சுங்கத்துறை அல்லது காவல்துறை அதிகாரி போலப் பேசுவார்கள். உங்கள் பெயரில் வெளிநாட்டில் இருந்து ஒரு சட்டவிரோதப் பொருள் (போதைப்பொருள், ஆயுதம்) வந்திருப்பதாகக் கூறி, உங்கள் மீது வழக்குப் பதிவு செய்யப்படும் என மிரட்டுவார்கள். இதனால் நீங்கள் அதிர்ச்சியிலும், பதற்றத்திலும் என்ன செய்வதென்று தெரியாமல் தவிப்பீர்கள்.
உங்கள் பதற்றத்தைப் பயன்படுத்தி, வழக்கை உடனடியாக முடிப்பதற்கு அல்லது அபராதத்தில் இருந்து தப்பிக்கப் பணம் கேட்டுப் பேரம் பேசுவார்கள். மேலும், இந்த விஷயம் மிகவும் ரகசியமானது என்றும், யாரிடமும் கூறக்கூடாது என்றும், தொலைபேசி அழைப்பைத் துண்டிக்கக்கூடாது என்றும் நிபந்தனை விதிப்பார்கள். இது உங்களை மற்றவர்களிடம் உதவி கேட்பதைத் தடுத்து, அவர்களை முழுமையாக நம்ப வைத்துவிடும். நீங்கள் தனிமைப்படுத்தப்பட்டு, அவர்கள் சொல்வதைச் செய்யத் தொடங்குவீர்கள்.
இறுதியாக, அவர்கள் கொடுக்கும் வங்கிக் கணக்கு அல்லது யுபிஐ எண்ணுக்குப் பணத்தை அனுப்பச் சொல்வார்கள். ஓடிபி, லிங்க் என எதுவும் இல்லாததால், இது உண்மையான அதிகாரிகள்தான் என நம்பிப் பலரும் தங்கள் சேமிப்பை இழந்துவிடுகின்றனர். முன்பின் தெரியாத எண்களில் இருந்து வரும் அழைப்புகளில், இதுபோன்ற மிரட்டல்கள் வந்தால் ஒருபோதும் நம்ப வேண்டாம்.
எனவே, இது போன்ற அழைப்புகள் வந்தால் பதற்றமடைய வேண்டாம். உடனடியாக அழைப்பைத் துண்டித்து விடுங்கள். எந்தவொரு அரசுத் துறையோ அல்லது அதிகாரியோ தொலைபேசியில் மிரட்டிப் பணம் கேட்கமாட்டார்கள். சந்தேகம் ஏற்பட்டால், அருகிலுள்ள காவல் நிலையத்தையோ அல்லது சம்பந்தப்பட்ட நிறுவனத்தின் அதிகாரப்பூர்வ எண்ணையோ தொடர்புகொண்டு உறுதிப்படுத்துங்கள். உங்கள் விழிப்புணர்வே உங்கள் பணத்தைப் பாதுகாக்கும் சிறந்த ஆயுதம்.
